ہندوستان کی جدوجہد آزادی کی
تاریخ میں 1857کا سال ایک سنگِ میل کی حیثیت رکھتا ہے جب صدیوں سے دبے کچلے عوام
نے انگریزوں کے غاصبانہ اور جابرانہ اقتدار کے خلاف علمِ بغاوت بلند کیا۔ 1857 میں
جب ہندوستانیوں کے دلوں میں پکتا ہوا لاوا شعلۂ جوالا بن کر پھوٹا تو ہر شخص سر
پر کفن باندھ کر اس لڑائی میں حصّہ لینے کے لیے کود پڑا۔ اس لڑائی کی خاص بات یہ
تھی کہ اس میں بادشاہ، علما، بوڑھے، جوان،
مرد و عورت سبھی انگریزوں سے آر پار کی جنگ کرنے کو اُٹھ کھڑے ہوئے اور
شجاعت اور بہادری کی وہ مثالیں پیش کیں جو تاریخ میں سنہرے حروف سے لکھے جانے کے
قابل ہیں۔ 1857 کی جنگ آزادی میں جن لوگوں نے قیادت کی ذمے داریاں سنبھالیںان میں
بخت خاں کا نام منارۂ نور کی حیثیت رکھتا ہے۔
بخت خاں کو جنگ آزادی میں
شمولیت حاصل کرنے کی ترغیب مولانا سرفراز علی گورکھپوری نے دلائی جو گورکھپور کے
سوداگر محلے کے رہنے والے تھے ان کی فکری تبدیلی میں ان کا بہت بڑا ہاتھ
تھا۔سرفراز علی جنگ آزادی کے نمائندہ قائدین میں سے تھے۔ بخت خاں پہلے انگریزوں کی
فوج میں صوبیدار تھے۔سرفراز علی نے انھیں اپنی صلاحیتوں کو انگریزوں کے خلاف
استعمال کرنے اور ان سے برسرِ پیکار ہونے کی ہدایت دی۔ شروع میں تو انھوں نے کچھ
تامل کیا ‘لیکن آخر میں انھوں نے بخت خاں کو بغاوت میں حصّہ لینے کے لیے آمادہ
کر لیا اور وہ انگریزوں کے غاصبانہ تسلط سے نجات حاصل کرنے کی لڑائی میں شریک ہونے
کو تیار ہو گئے 1 بریلی سے بخت خاں تحریک
میں حصّہ لینے کے لیے جب دہلی پہنچے تو ان کے ساتھ سو علما بھی تھے2 جن کی رہنمائی سرفراز علی گورکھپوری کر رہے
تھے 3 مراد آباد کی پلٹن نمبر29 بھی ان
کے ساتھ تھی4 ان کا دہلی آنا بہادر شاہ
کے لیے نیک شگون ثابت ہوا۔ بہادر شاہ نے انھیں انقلابی فوجوں کی کمان سونپ دی 5۔جس
وقت وہ دہلی پہنچے تو بہادر شاہ نے ان کے
استقبال کے لیے احمد قلی خاں کو بھیجا ان کے ہمراہ حکیم احسن اللہ خاں، ابراہیم
خاں جنرل صمد خاں، غلام علی خاں اور چند افسر بھی موجود تھے 6 بخت خاں نے دہلی آنے کے بعد تحریک میں تیزی
لانے کے لیے ایک فتویٰ جہاد مرتب کرایا7ساتھ ہی انھوں نے ایک حلف نامہ بھی تقسیم
کرایا جن پر سات آٹھ ہزار سپاہیوں سے عہد لیا گیا کہ وہ آخر دم تک انگریزوں سے
لڑیں گے8 وہ اپنے ساتھ چار لاکھ خزانہ بھی
لائے تھے اور جو فوج ان کے ہمراہ آئی تھی اس کو وہ چھ ماہ کی تنخواہ پیشگی دے چکے
تھے9 بخت خاں کو دہلی پہنچنے کے بعد بڑے ہی اعزاز و مراتب سے نوازا گیا۔ انھیں
معزالدولہ فرزند کا خطاب دیا گیا، گور نر کا عہدہ ملا اس کے علاوہ انھیں صاحبِ
عالم اور بخت بلند خاں کا خطاب دے کر ان کی پذیرائی بھی کی گئی 10بہادر شاہ نے انھیں
ایک ڈھال اور تلوار بھی دی11 ان کے نام کی
مہر بھی بدرالدین مہر کن سے تیار کروائی 12اور انھیں دہلی میں موجود باغی فوج کا
کمانڈر انچیف بھی بنادیا13 ان کی تقرری کا
استقبال صادق الاخبار میں بھی کیا گیا۔ اس نے اپنی 6جولائی 1857کی اشاعت میں یہ
لکھا :
’’ آسائش رعایا ہند منظورِ خدا ہے اس لیے منتظم دوراں جناب محمد
بخت خاں بہادر جنرل کو عدالت،مدبری اور انتظام میں اپنا ثانی نہیں رکھتے ہمارا شفیق
بنایا ہے اور جناب موصوف نے حضور سے خلعت فاخرہ سپردوشمشیر پائی ہے۔ شہر کا انتظام
بخوبی کردیا۔‘‘14
بخت خاں نے قیادت کی کمان
سنبھالنے کی بعد بہت سے اہم فیصلے کیے شہر میں امن و امان کی فضا بحال کرنے کی
کوشش کی شہر کوتوال کو یہ واضح کردیا کہ بد امنی اور لاقانونیت کو کسی طرح برداشت
نہیں کیا جائے گا اور اگر انھوں نے لاپروائی کی تو وہ بھی سزا کے حقدار ہوں
گے15 لوٹ مار میں ملوث شہزادوں اور
مہاجنوں پر قدغن لگائی16 شکر اور نمک کے محصول کو معاف کرایا 17کیونکہ ان سے عام
انسانی زندگی متاثر ہوتی تھی فوج کو نئے سرے سے درست کیا ۔بچھڑا پلٹن کے نام سے ایک
نئی پلٹن کی تشکیل کی جس نے کئی مورچوں پر انگریزوں سے سخت مقابلہ کر کے انھیں
مشکل میں ڈال دیا۔18
بہادر شاہ چاہتے تھے کہ انگریزوں
کے خلاف یہ لڑائی ہندو مسلمان مشترکہ طور پر لڑیں اس لیے انھوں نے ہر وہ کوشش کی
جس کی ذریعے ملک میں فرقہ وارانہ ہم آہنگی اور بھائی چارے کا ماحول قائم ہو۔ شاہ
دہلی یہ جانتے تھے کہ گائے ہندوؤں کے لیے قابلِ تعظیم ہے اس لیے انھوں نے بخت خاں
کو احکام دیے کہ وہ منادی کرا دیں کہ اگر کوئی شخص گائے کی قربانی کرے گا تواسے
توپ سے باندھ کر اُڑا دیا جائے گا 19 چنانچہ بخت خاں نے شہر میں بہ آوازِ دہل یہ
اعلان کرادیا کہ کوئی شخص گائے کی قربانی نہ کرے 20اس بات کا ذکر اس عہد کے سبھی
وقائع نگاروں نے کیا ہے۔ نتیجہ یہ ہوا کہ 1857میں ہندوؤں اور مسلمانوں نے کندھے
سے کندھا ملا کر انگریزوں کو دادِ شجاعت دی اور انگریز اپنی بھرپور توانائیاں صرف
کرنے کے باوجود ان کی متحدہ قوت کو توڑنے میں ناکام رہے۔ اس بات کی تصدیق کے لیے
ملاحظہ ہو کیتھ ینگ کے خط کا یہ اقتباس جسے اس نے 2 اگست 1857کو اپنی بیوی کے نام
لکھا:
’’ بظاہر کل شہر میں زبردست فساد کے لیے ہماری امیدیں پوری نہیں ہو
سکیں بادشاہ نے نہ صرف گائے بلکہ بکری تک کی قربانی کے لیے شہر میں ممانعت کردی ہے
اور ایسا عمل کیا گیا تو یہ یقینا ہندوؤں کو مطمئن کرنے کے لیے کافی ہے۔ چنانچہ
بجائے اس کے کہ وہ لوگ آپس میں لڑتے ہمارے خلاف متحدہ اور بھرپور حملہ کرنے کے لیے
ایک ہوگئے ہیں تاکہ ہمیں برباد کردیں اور صفحۂ زمین سے ہمارا نام و نشان بھی مٹا
ڈالیں۔ 21
ان کے مد برانہ فیصلوں کی وجہ
سے ان کی عزت میں بہت اضافہ ہو گیا 27 جولائی کو صادق ا لاخبار میں ان کی مدح میں ایک
مثنوی شائع ہوئی جسے مولوی ظہور علی تھانہ دار نجف گڑھ نے لکھا تھا۔22
بخت خاں ایک بہادر اور نڈر
سپاہی تھے انھوں نے اپنی آخری سانس تک دہلی کو بچائے رکھنے کی کوشش کی مختلف
مورچوں پر شریک ہوئے اور وہاں کامیابی کے جھنڈے گاڑے جس کی تصدیق اس عہد کے بیشتروقائع
نگاروں نے کی ہے23 ان کی رہنمائی میں انقلابیوں نے انگریزوں سے زبردست مقابلے کیے۔
ان کے اندر فوجی حکمت عملی کی صلاحیت بھی موجود تھی لیکن ان کی قیادت کو سبھی
انقلابی تسلیم نہیںکررہے تھے وہ شہزادگان جو بدعنوانی میں ملوث تھے اور فوج کے وہ
افسران جنھیں کم اختیارات حاصل تھے وہ ان کے احکامات کو ماننے کو تیار نہیں تھے
خصوصاً غوث خاں اور سدھاری سنگھ جن کا رتبہ نیمچ میں برابر تھا دہلی میں اُن کا
مرتبہ بخت خاں سے کم ہو گیا تھا اس لیے ان کے اندر بخت خاں کے لیے زبردست حسد کا
جذبہ تھا اور وہ انھیں اپنا سپہ سالار ماننے کو تیار نہیں تھے24 یہ آپسی پھوٹ
انگریزوں کے لیے سود مند ثابت ہوئی اور اکثر مورچوں پر انقلابیوں کو شکست کا سامنا
بھی کرنا پڑا۔ سازشوں کے جال نے انقلابیوں کی طاقت کو کمزور بھی کیا‘ وہ الگ
کمانڈر مقرر کرنے کی بہادر شاہ سے سفارش کرتے رہتے تھے خود بخت خاں نے بھی یہ
خواہش ظاہر کی کہ میں صرف بریلی برگیڈ کی کمان سنبھالوں گا 25اس آپسی چپلقش نے بھی
تحریک کو کمزور کرنے میں حصّہ لیا اور ملک و قوم کو نااتفاقیوں کا نتیجہ بھگتنا
پڑا۔بخت خاں مورچے میں مصروف تھے کہ انھیں خبر ملی بہادر شاہ نے قلعہ چھوڑ کر ہمایوں
کے مقبرے میں جانے کا فیصلہ کر لیا ہے 26 اس خبر نے انھیں بیچین کردیا وہ اسی رات بہادر شاہ کے پاس گئے
اور کہا کہ حالات بے شک نازک ہیں انگریز شہر پر قابض ہو گئے ہیں انھوں نے قلعہ بھی
لے لیا ہے لیکن ابھی پورا ملک ہماری طرف امید بھری نظروں سے دیکھ رہا ہے اور آپ
کے نام سے جنگ جاری رکھی جا سکتی ہے آپ ہمارے ساتھ چلیں ہم محفوظ مقامات سے انگریزوں
سے جنگ جاری رکھیں گے آدمی رسداور ہتھیار فراہم کرنے کی ذمے داری ہماری ہوگی 27 بخت خاں کی تقریر کا بہادر شاہ پر اثر بھی
ہوا۔ انھوں نے دوسرے دن یعنی 20ستمبر 1857کو انھیں قلعہ میں بلایا 28
دوسرے دن وہ پھر گئے ان کے ساتھ وزیر خاں اور مولانا فیض احمد بدایونی بھی
تھے 29اس دوران انگریزوں کا جاسوس اور ایجنٹ الٰہی بخش جو بہادر شاہ کا سمدھی بھی
تھا بہادر شاہ کوشیشے میں اتار چکا تھا30 بہادر شاہ مایوس تھے اس دوران وہ دیسی
راجاؤں سے مدد کی درخواست کر چکے تھے جنھوں نے ان کی درخواست کا کوئی جواب نہیں دیا
تھا اور ان کی پکار صدا بہ صحرا ثابت ہو چکی تھی31بہادر شاہ نے اپنی صحت اور ضعیف
العمری کا حوالہ دے کر بخت خاں سے معذرت کر لی اور کہا کہ میرے جسم کی قوت جواب دے
چکی ہے بخت خاں کی اس دوران الٰہی بخش سے تیکھی گفتگو بھی ہوئی بخت خاں نے غصّے میں
تلوار بھی نکال لی بہادر شاہ نے بخت خاں کو روک دیا اور کہا کہ اب مجھے میرے حال
پر چھوڑ دو اور تم خود ہندوستان کی لاج رکھ لو اور اپنے فرض کو انجام دو۔32 بخت خاں ناامیدی اور مایوسی کی کیفیت میں وہاں
سے لوٹ آئے۔ الٰہی بخش نے ہڈسن کو مطلع
کردیا۔ بہادر شاہ کو انگریزوں نے گرفتار کرلیا 33 اور انھوں نے اپنے اس مجرم کو
جلاوطنی کی کرب ناک اذیت میں مبتلا کر کے ان سے اس جنگ آزادی میں شریک ہونے کی قیمت
وصول کرلی۔
دہلی سے شکست کے بعد وہ بدایوں
ہوتے ہوئے فرخ آباد پہنچے اور فتح گڈھ اور فرخ آباد کے معرکوں میں شریک ہوئے ولیم
میور کے مطابق بخت خاں نانا صاحب کے بھائی (400 سو محافظ عملہ) کے ہمراہ بدایوں
ہوتے ہوئے 23 اکتوبر 1857کو فرخ آباد پہنچے تھے 34فرخ آباد میں بھی وہ انگریزوں
سے نبرد آزما ہوئے لیکن شکست کھائی۔ انگریزوں کے تسلط سے قبل ہی دسمبر 1857کے
آخری ہفتے میں فرخ آباد سے نکل گئے 35
اور وفادار ساتھیوں کے ساتھ لکھنؤ روانہ ہو گئے تاکہ اودھ میں ہونے والی لڑائیوں
میں شریک ہوسکیں اس مرتبہ بھی ایک کثیر فوج ان کے ہمراہ تھی۔36
بیگم حضرت محل نے ا ن کا
استقبال کیا انھیں خلعت اور رومال عطا کر کے ان کی پذیرائی کی 37سلطان بہو نے انھیں
خلد منزل میں ٹھہرایا38لکھنؤ میں بھی انقلابی رہنماؤں میں گروہ بندی تھی وہ کسی
گروہ بندی میں شامل نہیں ہوئے اور بیگم حضرت محل کی فوج میں شامل ہو گئے۔16 مارچ
1858 کو عالم باغ کے مورچے میں شریک ہوئے 39 جب لکھنؤ بھی انقلابیوں کے ہاتھوں سے
نکل گیا تو بخت خاں نے شاہجہاں پور کا رُخ کیا جہاں احمد اللہ شاہ، ان کے پیر
سرفراز علی اور نانا صاحب موجود تھے40شاہجہاں پور میں بھی انگریزوں سے سخت مقابلے
ہوئے وہاں بھی جب انگریزوں کا پلڑا بھاری ہو گیا تو ان سبھی رہنماؤں نے محمدی کا
رُخ کیا۔ محمدی میں احمد اللہ شاہ نے ایک عارضی حکومت کا قیام کیا تو بخت خاں اور
نانا صاحب کے ساتھ ان کی کابینہ میں شامل ہوئے اس کابینہ میں بخت خاں وزیر جنگ
نانا صاحب دیوان اور سرفرازعلی (قاضی القضاۃ (چیف جسٹس) بنائے گئے 41جب کو لن کیمپبل
کی فوجوں نے محمدی پر قبضہ کر لیا تو وہ تحریک کے دوسرے رہنماؤں سرفرازعلی،محمود
خاں حضرت محل، نانا صاحب اور عظیم اللہ خاں کے ہمراہ نیپال کی طرف نکل گئے42 نیپال
میں پہنچنے کے بعد بخت خاں کے بارے میں کوئی خاص جانکاری نہیں ملتی۔رکٹس نے لکھا
ہے کہ بخت خاں بڑی جستجو کے بعد کہیں نہ ملا 43 ڈاکٹر سین نے لکھا ہے کہ وہ 13 مئی
1859کو ایک لڑائی میں مارا گیا 44 ایک روایت یہ بھی ہے کہ وہ اپنے آبائی وطن بنیر
ضلع سوات زخمی حالت میں پہنچ گئے اور وہیں ان کا انتقال ہوا 45 لیکن اس بات میں کسی شک و شبہے کی گنجائش نہیں
کہ انگریز اپنے ازلی دشمن کو پکڑنے میں ناکام رہے۔ ہندوستان کی تحریک آزادی کے
رہنماؤں میں بخت خاں کا مرتبہ بہت بلند ہے۔
جواہر لال نہرو کے اس بیان
کی صداقت سے انکار کی کوئی گنجائش نہیں کہ :
’’ اگر دہلی کی ساری جنگ کا ’تاج‘ بہادر شاہ ظفر تھا اور ہاتھ
پاؤں ہندو، مسلمان تھے تو اس جنگ کا دماغ بخت خاں تھا۔‘‘46
بخت خاں نے اپنی پوری زندگی
انگریزوں کے غاصبانہ تسلط سے نجات دلانے کے لیے صرف کردی۔ شجاعت اور اولوالعزمی کے
اس پیکر نے وطن مالوف کو غیر ملکی قبضے سے نجات دلانے کے لیے جو کوششیں کیں وہ تاریخ
کے اوراق میں سنہرے حروف سے لکھے جانے کے قابل ہیں اور جنھیں فراموش نہیں کیا جانا
چاہیے۔
حواشی
1 ایسٹ انڈیا کمپنی اور باغی علما از انتظام اللہ شہابی فاروقی پریس
دہلی،ص 73
2 1857 کا تاریخی روز نامچہ، از خلیق احمد نظامی، الجمعیۃ پریس دہلی
1958، ص15
3 اٹھارہ سو ستاون (دہلی، میرٹھ اودھ اور روھیل کھنڈ )ازخورشید مصطفی
رضوی، رام پور رضا لائبریری رامپور 2000،ص 285
4 اخبار الصنادید، از
حکیم نجم الغنی خاں رام پوری، رامپور پرنٹرس نئی دہلی ص 48
5 اٹھارہ ستاون (دہلی،
میرٹھ، اودھ اور روھیل کھنڈ ) از خورشید مصطفی رضوی ص 286
6 تاریخ عروج عہد
سلطنت انگلشیہ ہند،از ذکائ اللہ شمس المطابع دہلی 1940ص 594
7 جنگ آزادی
1857(واقعات و شخصیات) از ایوب قادری پاک اکیڈمی کراچی ص 402
8 بہادر شاہ اور ان کا
عہد، از رئیس احمد جعفری، علمی پرنٹنگ پریس لاہور 1957،ص 842
9,10 اٹھارہ سو ستاون (دہلی،
میرٹھ،اودھ اور روھیل کھنڈ ) از خورشید
مصطفی رضوی ص 286
11 . 57 کے ہیر و ازسیّدہ انیس فاطمہ بریلوی اقبال بکڈپو، بار
دوم ص88جنگ آزادی کے سرخیل از۔
ڈاکٹر محمد شاہد صدیقی، ایجو کیشنل پبلشنگ ہاؤس نئی دہلی
2013، ص 64
12 اٹھارہ سو ستاون کے
راہ نما (سوانحی خاکے) مرتبہ۔ اقبال حسین، قومی کونسل برائے فروغ اردو زبان نئی
دہلی 2009،ص 52
13 1857کے مجاہد، از
غلام رسول مہر، کتاب منزل لاہور، 1960، ص173
14 اٹھارہ سوستاون کے
راہ نما (سوانحی خاکے) مرتبہ، اقبال حسین ص 54
15 اٹھارہ سوستاون (دہلی،
میرٹھ،اودھ اور روھیل کھنڈ ) از خورشید
مصطفی رضوی ص 286
16 اٹھارہ سوستاون کے
راہ نما (سوانحی خاکے) مرتبہ۔ اقبال حسین،
ص54
17 ایضاً، ص 56
18 1857کا تاریخی روز
نامچہ، از عبداللطیف، مرتبہ:خلیق احمد نظامی، الجمعیۃ پریس دہلی 1958ص 164,165
19,20 سرگذشت دہلی،
مرتبہ: ڈاکٹر درخشاں تاجور،رام پور رضا لائبریری رام پور 2007،ص 167-68
21 KEITH Y0UNG: Delhi 1857,P 171
بحوالہ اٹھارہ سو ستاون (دہلی، میرٹھ، اودھ اور روھیل کھنڈ )
از خورشید مصطفی رضوی ص 297
22 جنگ آزادی کے سرخیل،
از ڈاکٹر محمد شاہد صدیقی،ص 78
23 سرگذشت دہلی، مرتبہ:
ڈاکٹر درخشاں تاجور،ص 144
24 اٹھارہ سو ستاون کے
راہ نما (سوانحی خاکے) مرتبہ: اقبال حسین۔ص 56-57
25 سرگذشت دہلی، مرتبہ۔
ڈاکٹر درخشاں تاجور۔ص236
26,27,28،دلی کی جاں کنی، از خواجہ حسن نظامی۔ص 37,39
بحوالہ جنگ آزادی کے سرخیل از ڈاکٹر محمد شاہد صدیقی،ص
74
29 جنگ آزادی کے سرخیل،
از ڈاکٹر محمد شاہد صدیقی،ص74
30 آزادی کی پہلی لڑائی
(1857) کے سورما، از جلیس عابدی، موڈرن پبلشنگ ہاؤس نئی دہلی 1989، ص 38
31 سرگذشت دہلی، مرتبہ
ڈاکٹر درخشاں تاجور، ص 250
32,33 اٹھارہ سو ستاون (دہلی، میرٹھ، اودھ اور روھیل کھنڈ ) از۔
خورشید مصطفی رضوی ص 329
34 Sir William Muir,Record of intelligence Deptt-217
بحوالہ جنگ آزادی کے سرخیل، از ڈاکٹر محمد شاہد صدیقی،ص86
35 جنگ آزادی کے سرخیل،
از ڈاکٹر محمد شاہد صدیقی،ص75
36 قیصرالتواریخ، جلد
دوم، از سید کمال الدین حیدر نامی منشی نولکشور لکھنؤ 1896،ص313
37 قیصرالتواریخ، جلد
دوم، از۔ سید کمال الدین حیدر،ص 313-14
38 اٹھارہ سو ستاون کے
راہ نما (سوانحی خاکے) مرتبہ۔ اقبال حسین، ص 64
39 اٹھارہ سو ستاون کے
راہ نما (سوانحی خاکے) مرتبہ، اقبال حسین، ص65
40,41 اٹھارہ سو ستاون (دہلی، میرٹھ، اودھ اور روھیل
کھنڈ ) از۔ خورشید مصطفی رضوی،ص 617
42 علمائے ہند کا شاندار
ماضی (جلد چہارم) از مولانا سید محمد میاں کتابستان دہلی 1985 ص 430-31
جنگ آزادی 1857 (واقعات و شخصیات ) از محمد ایوب قادری، ص
460
43 جنگ آزادی کے سرخیل،
از ڈاکٹر محمد شاہد صدیقی،ص76
44 اٹھارہ سو ستاون کے
راہ نما (سوانحی خاکے) مرتبہ: اقبال حسین، ص 65
45 وکی پیڈیا۔
46 سرگذشت دہلی، مرتبہ۔
ڈاکٹر درخشاں تاجور۔ص 296-95
Darakhshan
Tajwar
Kainat, B-34,
Tewari Pur
Awas Vikas
Colony
Gorakhpur -
273001 (UP)
Mob.:
7007281376
کوئی تبصرے نہیں:
ایک تبصرہ شائع کریں